Timor-Leste nia atleta foin-sa’e sira promete atu haburas

Timor-Leste nia atleta foin-sa’e sira promete atu haburassira nia rai no mós sira nia abilidade iha tempu, distánsia no hiit-besi.

Programa konjunta ida entre Nasoins Unidas iha Timor-Leste no Komité Olímpiku Nasionál estabelese ona “Atleta Timor-Leste ba Dezenvolvimentu Sustentável,” atu forma grupu foin-sa’e ida no mós desportista feto ho mane sira seluk ne’ebé hakarak kontribui harii komunidade sira metin liu tan. 

 Atleta sira ne’e hala’o hela formasaun iha dezenvolvimentu pesoál, mídia, diskursu públiku, no mós servisu ona hamutuk ho ekipa Nasoins Unidas nian iha Timor-Leste atu koñese dezafiu sira dezenvolvimentu nian.

 Sira nia kursu formasaun ne’e ramata iha semana ida ne’e ho aprezentasaun husi atleta sira hotu kona-ba medida ne’ebé sira decide ona atu ajuda dezenvolve Timor-Leste.

 “Atleta sira ne’ebé sei joven, forte, no ativu, bele marka diferensa bainhira sira enkoraja ema hotu-hotu atu kuidadu sira nia saúde di’ak liu tan iha ita-nia moris; promove hahán sira ne’ebé saudável ba labarik sira, no halo advokasia ba ema hotu-hotu atu hetan imunizasaun; fó raan; atende eskola, proteje meiu ambiente no respeita feto ho labarik-feto sira,” Koordenadór Rezidente Nasoins Unidas nian iha timor-Leste, Sr. Roy Trivedy, hatete.

“Ami hakarak haree joven sira ne’e hetan susesu iha kompetisaun mundiál, maibé sira nia dezafiu boot liu mak oinsá ajuda halakon pobreza, no supera problema sira ne’ebé mosu tanba akesimentu global.” 

 

 Sekretáriu Jerál Komité Olímpiku Nasionál, Sr. Laurentino Guterres, hatete katak rai ida ne’e bele iha orgullu ba ninia atleta sira.

 “Sira servisu maka’as no determinadu atu fó sira nia abilidade tomak atu reprezenta sira nia país,” Sr. Guterres hatete.

“Movimentu Olímpiku ne’e atu kria mundu ida di’ak liu tan ba ema hotu-hotu.

 “Ami hakarak enkoraja ema hotu-hotu atu partisipa iha desportu, atu hetan benefísiu husi isin no neon ne’ebé saudável; apresia servisu ekipa nian, disiplina no aprende abilidade foun.

 “Atleta sira ne’e hatene katak sira goza ho apoiu husi sira nia komunidade atu haruka sir aba tasi-balun atu tuir kompetisaun. Sira hakarak fó fali buat ruma, no maneira ida atu fó fali mak ba sira atu enkoraja modu de vida ida saudável liu tan.

  “Ami iha orgullu boot ba sira hotu.”

Públiku bele hasoru malu ho “Atleta Timor-Leste ba Dezenvolvimentu Sustentável” iha Olympic Day Fun run no atividade sira iha resintu Palácio do Governo husi tuku 8:00 dadeer.


Imprimi   Email