Opiniaun Editoriál husi Ekipa ONU iha Timor-Leste: Oportunidade atu aprende husi “Maria” – Lisaun korajen ida iha pasadu ba futuru ida ne'ebé nakonu ho dame

Blogs Acessu dala: 355

Dili, 25 Novembru 2018 –foin lalais ne'e ha’u dada-lian ho feto ida ne’ebé haʼu sei hanaran “Maria”—maibé neʼe laos nia naran neʼebé loos, hakarak atu konta tuir ninian istória kona-ba tortura, asaltu fiziku no nia terus, atu nune’e bele sai lisaun ba jerasaun sira futuru Timor-Leste.

Maria hakarak ita hotu-hotu atu bele gozaliberdade no mos responsabilidade ne'ebé mai ho independénsia ne’e.

Bainhira nia hetan kaptura no tortura hosi militár Indonézia nia ho de'it tinan 20, sira akuza nia hanesan kolaboradór ho movimentu rezistensia. Maske hetan esperiénsia tortura, inklui violénsia seksuál, no stigma no trauma ne'ebé kontinua sai dadur, nia konsege ultrapasa esperiénsia nakukun hirak ne'e. Nia sai lian ida ne’ebé forsa no esperansa.

Iha pais ne’e, feto sira barak mak fahe istória ne’e – istória pasadu no prezente. Enkuantu nasaun manán ona ninia independénsia, feto barak sei sai vulneravel ba violénsia no abuzu.

Estudu Demográfiku no Saúde nian iha 2016 hatudu katak pelumenus katoluk-ida ba feto hotu-hotu iha esperiénsia violénsia fízika iha sira-nia moris.

Ita mós hatene katak feto grupu balu, hanesan labarik-feto, feto sira ho defisiénsia, feto sira neʼebé ulun uma-kain, feto sira ne'ebé ferik no membru komunidade lesbian, gay, bisexual, transgender no intersex dala barak hasoru ameasa ne'ebé oin-oin kona-ba violénsia. Iha kontestu diferente, maibé uza poder hasoru feto sira, dala barak husi mane, nafatin hanesan.

Hanesan ita komemora Loron Internasionál Hapara Violénsia hasoru Feto iha loron 25 fulan-Novembru, ita iha oportunidade atu aprende hosi feto no mane sira-ne'ebé sofre maibé maski kontinua atu kontribui ba dame ne'ebé goza hosi nasaun ne’e ohin loron. Sira-nia istória hatudu mai ita katak independénsia ladauk transforma ba liberdade ba ema hotu-hotu husi violénsia.

Ita bele aprende husi istória hirak ne'e no hapara violénsia antes akontese. Ita ida-idak iha kbiit atu rona ba Maria, no observa semak iha kbiit - iha ita-nia uma, iha fatin ita-nia servisu no ita nia sosiedade. Ita tenke aten-brani koʼalia hanesan "Maria", defende kuandu ita haree ema sira ne'ebé uza sira-nia podér ba ema seluk liu husi violénsia. Ita tenke hamriik iha solidariedade ho ema sira-ne'ebé sofre hosi abuzu-podér. Ita iha poder ida ne'e, tanba ita hotu-hotu hanesan, hanesan mós iha dokumentu Deklarasaun Universál Direitus Umanus hateten.

Nasoins Unidas iha Timor-Leste iha kompromisu atu aprende no rona ba sobrevivente husi violensia - hosi jerasaun tuan ba foin-sa'e sira iha independénsia. Hamutuk, kuandu ita #HearMeToo #RonaMosHau, ita bele kontribui ba sosiedade ida-neʼebé ita hotu hetan tratamentu ho respeitu, hanesan iha ita-nia liberdade, no selebra iha ita-nia diversidade. Istória sira-neʼe sei fahe iha Facebook ho #HearMeToo #RonaMosHau. Fahe sira ho ita.

Roy Trivedy,
Koordenadór Rezidente
ONU iha Timor-Leste.

Imprimi