Dalan ba futuru: Dezafiu no oportunidades ba Governasaun Timor-Leste tuir mai

Iha loron ikus semana ida ne’e povu Timor-Leste sei hakat ba fatin votasaun hodi vota no hili Governu Konstitusional da-waluk iha eleisaun parlamentar loron 12, fulan Maiu.

Ema liu husi 784,000 iha munisipius 13 maka eleijivel atu vota, no bele hili total husi partidus politikus nain ualu (8) ho sira nia koligasaun.

La hare ba se’e deit maka sei forma Governu foun hafoin eleisaun, sei iha dezafius importante barak ba nasaun iha oin.

Laiha duvida katak Timor-Leste atinji buat barak ona desde ninia independensia iha tinan 2002, inklui hari’i instituisaun estadu nian no nasaun nia kapasidade organiza eleisaun nebe livre no justu; progresu hadiak standarizasaun moris, inklui indikador prinsipal saude nian, no iha redusaun ba proporsaun ema moris iha mukit nebe signifikante husi 50% iha tinan 2007 no estimasaun ba 42% iha tinan 2014.

Kresimentu ekonomiku, maske depende maka’as ba reseita petroleu nian, relativamente forte ona ho media kuaze 5,6% iha kada tinan durante periodu independensia.

Maske nune’e, iha área barak mak sei eziji konsiderasaun imidiata no asaun nebe konsertu. Ministrus hirak tuir mai presiza konsentra uluk ba nesesidade atu diversifika ekonomia no permite nasaun foun ida ne’e hakat liu ninia dependesia ba reseitas petroleu no gas nian.

Ho area esplorasaun gas Bayu-Undan, nebe hatama ona 95% prerogativa real petroleum no gas Timor-leste nian, iha mos estimasaun katak sei hotu iha tinan 2021 no negosiasaun kona ba prosesu petroleu no gas husi Greater Sunrise provavelmente sei kontinua ba futuru previsível, investimentu iha area prinsipais inklui enerjia renovavel mos persiza atu tau atensaun lalais, hare ba alternativu no kestaun komplementar hodi kria kampu servisu ka empregu no suporta dezenvolvimentu turizmu.

Nesesidade atu aselera kresimentu lideradu iha seitor-privadu nudar defaziu importante seluk ida. Ohin loron ekonomia depende maka’as liu ba seitor-publiku.

Persiza kria barak liu tan kampu servisu no oportunidade iha seitor-privadu, no ida ne’e eziji asaun signifikante atu redus ka hamenus bareira hodi estabelese no prezerva negosiu iha Timor-Leste, husi nasaun 190, Timor-Leste klasifikadu iha nivel 178 kontra indikador “Fasilidade hodi Halo Negosiu” iha Banku Mundial nia indise Halo Negosiu. Prioridade iha area prinsipal sira seluk maka dezenvolvimentu iha Timor-Leste ninia rekursus nebe valorizadu: ninia ema, inklui mane, feto, joven ka foinsa’e feto no mane.

Relatoriu Nasional Dezenvolvimentu Umanu Timor-Leste 2018 lansa iha Abril 2018 hetan katak, investimentu nebe la adekuadu iha edukasaun no treinamentu rezulta foinsa’e ka joven barak maka laiha servisu, barak mos sente la preparadu ba iha merkadoria servisu nian no laiha abilidade nesesariu hodi asesu servisu nebe desentes ka diak.

Atu TimorLeste masimiza oportunidade ba dezenvolvimentu sustentavel no hadau benefisiu husi dividendu demografiku, nasaun persiza halo investimentu nebe los no adekuadu iha tempo nebe lolos ho maneira nebe relevante, Ministrus hirak tuir mai persiza konsideira ho kuidadu rekomendasaun prinsipais husi relatorio refere, inklui: alokasaun 25% orsamentu nasional ba iha edukasaun no treinamentu, hamutuk ho mudansa komportamentu; hadiak kualidade edukasaun; insentiva seitor privado hodi investe no kria treinamentu no oportunidade barak liu tan iha “servisu desentes”; hadiak fornesimentu be’e mos (água potável) no instalasaun saneamentu iha fatin hotu iha nasaun; no habelar asesu ba atensaun saude primaria no planeamentu familiar.

Agrikultura iha nasaun ida ne’e mos iha faze kritiku. Ida ne’e nudar fonte prinsipal sustentu nian ba aprosimassaun 80% husi populasaun, maibe agrikultores ka to’os nain barak – feto no mane – iha asesu nebe limitadu ba iha irigasaun, fini nebe apropriadu no pestisidas nebe nesesariu ba iha produsaun agrikola sustentavel, produtiva no efisiente.

Hasa’e kresimentu investimentu nesesariu iha area ida ne’e, nune mos iha area pekuaria, turizmu, entretenimentu, desportu, artes no seluk seluk tan, hodi ajuda diversifika ekonomia no kria oportunidade foun ba kampu servisu ka empregu ba ema hotu iha nasaun ida ne’e.

Prioridade importante sira seluk nebe Governu foun persiza konsideira inklui maneira diak liu oinsa atu hadiak nivel malnutrisaun nebe a’as tebes iha nasaun – liu husi 40% labarik, liu-liu labarik feto, nebe sofre husi destrunisaun no desperdisiu – nudar kontribuitor wain ba iha rezultadu aprendizajen nebe mukit no mos produtividade forsa ba iha servisu nebe menus.

Nesesidade hodi tau atensaun ba akontabilidade, tranparensia, no efisiensia iha despezas publiku provavelmente eleitores sira sei hare ho didiak. Tamba pedidu rapidu ba desentralizasaun poder kontinua buras, governasaun tuir mai persiza aproveita oportunidade hodi fortalese antikorupsaun, transparensia no akontabilidade iha seitorpubliku no prestasaun servisu iha nivel munisipal no nasional.

Hanesan mos sidadaun sira seluk iha nasaun, hau fiar katak dezempenhamentu governasaun tuir mai sei determina futuru nasaun ba dekada tuir mai no ba tempu ka durasaun wain liu tan. Maske nasaun ida ne’e infrenta dezafius balun, iha mos oportunidade nebe wain.

Kriasaun servisu, prestasaun efikas servisu nian, hadiak bemestar sidadaun hotu nian no desentralizasaun nebe efetivu, imperativu tebes hodi asegura moris diak ema hotu nian no Ema-Ida sei la hela iha kotuk no ida ne’e katak Timor-leste nia dalan ba nasaun dezenvolvidu seguru.


Imprimi   Email