Pergunta Corona ba Timor-Leste: Kestaun ‘bainhira’ la’ós ‘karik’?

Husi Roy Trivedy

Rezidente Koordenadór ONU

Hafoin foti medida extraordinária, velosidade surtu iha Xina ikus mai hahú ona hatudu sinál tun neineik. Maske iha optimizmu ida kautelozu, agora ne’e sei sedu liu ba ita atu hatete katak surtu ne’e agora iha faze inisiál, iha klaran ka iha ona rohan iha ne’ebá. Maske nune’e, saida mak ita preokupa liu agora maka surjimentu ba foku surtu ida ne’e iha país sira seluk hanesan Korea Súl, Itália no Iraun. Aparesimentu kazu foun iha país sira ho sistema saúde ne’ebé ‘ladún dezenvolvidu’ – ho sira nia abilidade atu jere ka kontrola surtu ida ne’e – preokupante tebetebes.

 Importante tebetebes ba nasaun hotu-hotu – inklui Timor-Leste – atu proativamente avalia no haforsa preparasaun no resposta ba emerjénsia global ida ne’e. Hanesan pozisaun atuál OMS nian fó-hanoin ita: “Ami enkorajadu ho kontinuasaun ba diminuisaun kazu iha Xina. Ami kontinua preokupa ho indikasaun ba aumentu iha transmisaun fora husi Xina no ami apela ba país hotu-hotu atu investe urjentemente iha preparasaun bainhira kazu ne’e mai, no prioritiza protesaun saúde ba funsionáriu saúde sira nian, indivíduu sira ne’ebé iha risku no komunika di’ak liu tan risku transmisaun ba sira nia sidadaun sira.”

 Governu no povu Timor-Leste foti ona  pasu importante balu atu prepara ba emerjénsia ida ne’e. Servisu hamutuk ho parseiru hanesan OMS, pontu entrada sira hanesan aeroportu iha ona ekipamentu detetór térmiku ho kartaun deklarasaun saúde instaladu. Enkuantu ita hein hela test kit atu to’o mai iha Laboratóriu Nasionál Dili, iha ona mekanizmu atu teste ita nia amostra iha laboratóriu proeminente ida iha Melbourne. Formasaun kona-ba jestaun apropriadu ba pasiente sira fornese ona ba funsionáriu saúde nian no ekipa emerjénsia ho sistema vijilánsia hetan daudaun reforsu. Adisionálmente, esforsu konjuntu mós la’o hela atu oferese informasaun rápidu ne’ebé loos no fiável ba públiku, mídia no parseiru sira iha governu no mós iha li’ur. Krítiku tebetebes atu halakon rumór ho teoria konspirasaun oioin ne’ebé nakonu iha mídia sosiál.

 Gabinete Primeiru Ministru liuhosi boletín Jornal da República anunsia ona desizaun atu estabelese Komisaun Koordenasaun Inter-ministeriál ida atu  “prevene no kontrola” COVID-19 iha Timor-Leste

 Maske nune’e, karik ita hakarak jere kazu ne’e ho susesu ‘bainhira’, no la’ós ‘karik’, virus ne’e mosu iha ita-nia rain, buat barak tan mak ita presiza atu halo. Ha’u hakarak foka ba elementu prinsipál rua iha ne’e. Uluk-nana’in mak ita tenke identifika no estabelese fasilidade saúde atu izola, observa no fó-tratamentu ba kualkér suspeitu kazu ruma tau iha kuarentena sira nia kontaktu prósimu sira. Segundu, estabelese mekanizmu koordenasaun efetivu iha Ministériu Saúde nia laran no mós ho ministériu sira seluk tanba kazu kontráriu, resposta efetiva ba emerjénsia ida ne’e sei la posivel.

Ita iha oportunidade hotu-hotu atu haforsa ita-nia preparasaun emerjénsia, maibé ba ita atu iha biban prevene virus ne’e da’et ba ema no jere ninia potensiál impaktu ho susesu, ita labele haluha lisaun boot husi Xina nia resposta frántiku – “Book an lalais mak esénsia”. Ba ita atu hetan susesu, ita tenke foti asaun lalais – tanba laiha ona tempu barak atu lakon!


Imprimi   Email