Camille Wauters: “ITA HARÉ OINSA MUDANSA SIRA NE’E POSITIVU ONA BA SOSIEDADE”

Camille Wauters servisu ona ho UN Women dezde 2008. Nia komesa ho servisu iha Nigeria liuhusi programa UN Volunteer hanesan ofisial ba UN Women nia porgrama Empoderamentu Ekonomia ba Feto, depois kontinua fali servisu iha Palestina. Nia servisu ona iha UN Women nia edifisiu iha Timor-Leste husi tinan 2014, ne’ebé nia maneja programa integrasaun jéneru, no depois ba iha programa Feto, Pas no Seguransa. Mai ita rona kona ba Mana Camille nia servisu ho UN Women iha Timor-Leste:

Saida mak sai hanesan ita nia refleksaun iha tinan 5 ikus nian kona ba mudansa iha igualdade jéneru no Feto, Pas no Seguransa iha Timor-Leste?

Mudansa barak mak akontese ona. Tamba nasaun ne’e komesa hari fali husi ninia luta ba independencia, ne’ebé iha ligasaun ho direitu umanu, igualdade jéneru, nasaun ne’e vibrante tebes no hanesan nasaun ida husi nasaun barak ne’ebé avansadu tebes iha asuntu igualdade jéneru. Klaru katak iha mos ninia progresu no dezafiu barak. Tamba iha advokasia ne’ebé forte husi grupu feto sira, iha ona progresu barak ne’ebé halo ona. Liuliu iha parte legal nian. Iha ona quota ba feto iha parlamentu, no mos iha nivel suku. Iha advokasia forte ba feto sira iha seitor seguransa, ne’ebé lidera ona ba Planu Asaun Nasional ba Feto, Pas no Seguransa no aprova ona iha tinan 2016. Ida ne’e lori tebes mudansa ida ba iha Ministerio Defesa no Ministerio Interior nia laran, ne’ebé mak agora dadaun iha feto nain tolu no mane nain tolu mak sai hanesan direitor/a geral, involve iha nivel as tebes hodi foti desizaun.

Saida mak halo UN Women hanesan organizasaun ida ne’ebé ùniku?

Ita servisu ho ema grupu ida ne’ebé mak dedikadu tebes ba sira nia servisu, no fiar tebes katak mudansa sei akontese no ita hotu iha nebá atu realiza ida ne’e. Servisu iha UN Women, ita servisu ho parseiru husi governu iha nivel as tebes ba foti desizaun. Entaun ita bele servisu hamutuk ho ita nia maluk sira hodi lori mudansa ba iha nasaun nia laran iha nivel makro liuhusi mudansa politika no lei sira. Ita hare oinsa mudansa sira ne’e positivu tebes ona ba sosiedade.

Saida mak ita gosta liu kona ba servisu hamutuk ho UN Women iha Timor-Leste? 

Servisu hamutuk ho ekipa, ho ami nia belun no parseiru sira hotu. Hau kontente tebes bele estuda husi parseiru sira, liuhusi haré sira nia komitmentu no profesionalismu no hare ba mudansa ne’ebé ita bele halo. Por ezemplu, iha Ministerio Interior nia laran servisu hamutuk ho Diretoria Nasional ba Prevensaun Konflitu Komunidade, ne’ebé iha parseria ne’ebé forte tebes ho UN Women.

Ho ami nia fiar ne’ebé hanesan, lori ami ba dezemvolve buat ida ne’ebé ùniku ba iha ami nia servisu hodi haforsa no instituinaliza aproximasaun responsivu ba jéneru iha mediasaun. Aprosimasaun foun ida ne’e, sei fo espasu barak liu tan ba feto sira atu koalia iha prevensaun no rezolusaun ba konflitu iha komunidade. Hau fiar katak ida ne’e sei lori mudansa ida ne’ebé profundu ba iha Timor-Leste, ne’ebé mak tradisionalmente feto sira la autoriza atu koalia iha pratika sira ba rezolusaun konflitu komunidade nian. Hau mos aprende barak tebes husi feto no mane sira ne’ebé hau servisu hamutuk ho, espesialmente iha nivel munisipiu. Tamba ita nia servisu barak foka liu iha nivel nasional ho ita nia instituisaun sira, wainhira ita komesa servisu iha nivel munisipiu, ita hakfodak tebes haré sira nia komitmentu ne’ebé bot tebes no oinsa sira lori mudansa ba iha sira nia komunidade, ho suporta ituan tebes ne’ebé iha.

Saida mak sai hanesan ita nia mehi ba iha advokasia igualdade jéneru iha Timor-Leste?

Atu kontinua servisu. Hau hanoin katak haré ba Timor-Leste nia istoria ne’ebé naruk kona ba servisu ba advokasia no luta ba kauza injustisa sira, ita iha advogador ba igualdade jéneru balu ne’ebé forte tebes – tanto feto no mane – ne’ebé hau hatene katak sei lori ida ne’e ba oin. Hau hein katak ita sei rona liu tan lian husi nivel munisipiu sira. Iha nivel nasional ita atinji buat barak ona, espesialmente iha parlamentu no governasaun, iha ne’ebé feto sira foti ona pasu hakat ba oin signifikante tebes. Maibe sei presija suporta barak liu tan iha nivel munisipiu, no ida ne’e mak iha ne’ebé desizaun bot sira tuir mai sei foti, espesialmente tamba ita iha prosesu dezentralizasaun nia laran ne’ebé sei akontese iha Timor-Leste. Ita presija atu suporta sira, no hau hanoin katak tipu servisu sira hansa ne’e importante tebes.


Imprimi   Email